TBZ Missionary Nl. H. Lalduhzuali Testimony

 

Nl. H. Lalduhzuali hi ni 09/02/1996 ah Er. H. Vanlalfala (L) leh C. Zothanpuii te fa pathumna ni turin Kulikawn PHC ah a lo piang a. An unau hi pali an ni a, chungte chu:

1.   Zirsangliani

2.   H. Lalngaihzuali

3.   H. Lalduhzuali

4.   Haudingliana

        Tunah hian a nu hovin Upper Republic-ah L.Z. Sailo Building-ah mi in luahin an khawsa a ni.

        Zirna lamah chuan MSW 2019-ah a zir chhuak a ni.

Missionary tura a in pek chhan/dan:

        Kum 1999 November thlaah kum 3 mi a nih laiin chhun dar 11:00 velah step atangin a tla a, nikhaw hrelovin a awm a, tichuan Aizawl Civil Hospital-ah kalpui a ni a. Doctor-ten uluk taka an en hnuin a lu hi a sawh na hle niin “mihring lam atang chuan tih theih kan nei lo ve” tiin amah pawn engmah a hre tawh lova, a thlarau pawh hlan vek anih hnu ah zan dar 6:30 velah a lo harh chhuak leh ta a, chutah chuan Doctor-te chuan a nu hnenah lo kalin, “Ka pi, i fanu hi kan tih dam ni lovin chung lam Pathian tihdam a ni e, Pathian hnenah lawm thu sawi mawlh mawlh rawh u” an ti a. Chutah a nu thinlungah chuan, “Kan fanu hi LALPAN a duh a ni ” tih hi a lo lang nghal a. Chuta tang chuan a nu leh pate chuan Pathian hnenah “Hei chu Lalpa tan” tiin an hlan ta a, chhung inkhawmnaah te sawi thinin Pathian hnenah pawh “Lalpa i duh chuan tha i tihna hmuna kal turin buatsaih ang che” tih hi an tawngtaina ber a ni.

        Tichuan amah pawh chu nu berina a sawi fo leh a lo tawngtaina te hre rengin thuawih takin lehkha a zir chho zel a, missionary-a kal tur chuan a rilru a siam ta a, kum 2019-ah MSW a zir chhuak a, tichuan hna dang dil pawh tum lem lovin missionary an lak hmasak bera dil ve turin a inbuatsaih a, TBZ missionary lak a ni dawn tih a hriat veleh a form-te a va la a, March 2020-ah a form lakchhuah a ni a, Covid-19 hri avangin total lockdown-in a nang leh rih a, tichuan hri lengte a ziaawm deuh hnu, kum khat hnuah, 2021 March-ah interview niin hetah hian lak zingah a lo tel ve ta a, lawm takin a lo pawm ta a ni.

        A awmna hmun tur hi Madhya Pradesh-a Kanapur-ah Ebenezer English Medium School-ah Evangelist Teacher tana ruat a ni.

 

“Lalpa kal tura min duhna hmun apiang chu,

Tlang sang tak leh tuipui fawn vel kar pawh ni se,

I thu leh kraws mawia min thuam chuanin,

I hmangaihna thu hi ka hril zel ang”